Sjónleikarakvinnan Lynn Cohen deyð

Sjónleikarakvinnan Lynn Cohen, sum helst er best kend fyri leiklutin sum Magda í "Sex and the City", andaðist fríggjadagin 14. februar, 86 ára gomul.

Tað boðar managarin hjá henni, Josh Pultz, frá. Sambært The Guardian, er enn ógreitt, hvørjum hon doyði av.

Í HBO røðini "Sex and the City", spældi Lynn Cohen at vera húsarhaldskonan og barnagentan hjá sakføraranum Miranda Hobbes (Cynthia Nixon). Hon spældi bæði við í røðini og báðum filmunum.

Lynn Cohen hevur spælt við í nógvum filmum, sjónvarpsrøðum og sjónleikum. M.a. hevur hon spælt við í "Across the Universe", "The Hunger Games: Catching Fire", "The Marvelous Mrs. Maisel" og "Days of our Lives"