Sjúkrarøktarfrøðingur undir illgruna fyri at hava dripið sjúklingar

En mannligur sjúkrarøktarfrøðingur í Útsynningstýsklandi er undir illgruna fyri at hava dripið í minsta lagi fimm sjúklingar við heilivági.

27 ára gamli maðurin er, sambært ákærumyndugleikanum í týska býnum Saarbrücken, undir illgruna fyri fimm dráp og tvær drápsroyndir.

Í 2016 varð maðurin tikin á búri, tá hann latst at vera lækni fyri at fáa atgongd til sjúklingar á einari intensivdeild. Tá hevði hann bert verið í starvi á sjúkrahúsinum í seks vikur, men tá vóru kanningar longu settar í gongd, eftir at hann hevði givið sjúklingum heilivág, sum ikki var ætlað teimum.

Drápini skal hann eitast at hava framt á einum fyrrverandi arbeiðsplássi.

Sambært Politiken, hevur løgreglan gravað leivdirnar upp av sjey møguligum ofrum í sambandi við kanningararbeiðið.

Fyri fáum mánaðum síðani, var ein annar týskur sjúkrarøktarfrøðingur, Niels Högel, dømdur fyri at hava dripið fleiri enn 100 sjúklingar.

Högel byrjaði í starvi á sjúkrahúsinum í Oldenburg í 1999, og árið eftir byrjaði hann at fremja brotsgerðir sínar. Í rættinum kom tað fram, at talið á dripnum sjúklingum var meira enn 100, og ákærumyndugleikin segði, at talan møguliga er um fleiri enn 200 offur.