Skála skúli vann Veðurlagsvirðisløn Føroya Lærarafelags annað árið á rað

Í gjár var hátíðarhald í Skála skúla, í samband við at skúlin annað árið á rað hevur vunnið Veðurlagsvirðisløn Føroya Lærarafelags.

Heimasíðan hjá Runavíkar kommunu skrivar, at fleiri av næmingunum og lærarunum høvdu orðið, forkvinnan í Umhvørvisnevnd býráðsins, Jonnhild Reynholdsdóttir, flutti fram røðu, og borgarstjórin ynskti skúla, lærarum og næmingum hjartaliga til lukku við hesum, "at liggja í broddi fylkingar, táið tað snýr seg um burðardygd í samspælinum millum okkum og natúruna"

Í fráboðan frá Lærafelagnum stendur millum annað, at "Skála skúli hevur skarað framúr í arbeiðinum at geva børnum og ungum áhuga fyri og innlit í veðurlagsavbjóðingar og loysnir á veðurlagsavbjóðingum".

Fyri hetta varð ein upphædd á 25.000 krónur handað frá Betri samtakinum.