Skógareldur á Tenerife: 26.000 fólk flutt burtur

Síðan týsdagin hava skógareldar herjað á sponsku oynni Tenerife, ið er tann størsta av Kanarisku Oyggjunum.

Tamarhald er ikki á eldinum, sum sambært forsetanum á oyggjunum, Fernando Clavijo, er tann mest torgreiddi eldurin, sum hevur rakt oyggjarnar í 40 ár.

Sambært lokalu bjargingartænastunum eru 26.000 fólk flutt burtur frá rakta økinum. Eldurin hevur oyðilagt umleið 5.000 hektarar av jørð.

Í gjár varð boðað frá, sambært tíðindastovuni AP, at 265 sløkkiliðsfólk stríddust við eldin við hjálp frá flogførum, og at meira hjálp var ávegis. Eingin fráboðan hevði tá verið um fólkaskaða.