Skoytubreytin í Klaksvík letur upp fyrst í komandi viku

Veðrið var av tí fagrasta í gjár, og tí var avgjørt at royndarkoyra skoytubreytina ein dag, áðrenn ringa veðrið herjar á um vikuskiftið.

Soleiðis skrivar Klaksvíkar kommuna, sum nú hevur royndarkoyrt skoytubreytina, sum eftir ætlan verður latin upp fyrst í komandi viku.

Hóast kommunan ikki alment hevði boðað frá, at møguleiki var at royna skoytubreytina í gjár, frættust boðini ómetaliga skjótt, og sera nógv børn og ung gjørdu sær dælt av royndarkoyringini í góðveðrinum í gjár, skrivar kommunan.

(Mynd: Klaksvíkar kommuna)

Undirlagið á skoytubreytini er øðrvísi í ár, og vónar kommunan, at tað fer at gera tað nemmari at halda skoytubreytina frysta.

Veðrið fer óivað at hava við sær, at har verða dagar í vetur, har skoytubreytin má verða stongd, og tí vísir Klaksvíkar kommuna til eina Facebook síðu, har til ber at kunna seg um upplatingartíðir og annað virksemi, sum víðvíkur økinum við skoytubreytina.