Skuldsettur fyri rúsdrekkakoyring

Klokkan hálvgum átta í gjárkvøldið fekk løgreglan eina fráboðan um ein bil, sum koyrdi óstøðugt í miðbýnum í Havn.

Løgreglan fór út, fann bilføraran, og tað vísti seg, at viðkomandi var ávirkaður av rúsdrekka, og er hann nú skuldsettur fyri rúsdrekkakoyring.

– Bilurin tók í ein annan, og fólk ringdu til okkum, tí tey sóu, at førarin hevði ilt við at koyra, sigur vaktleiðarin á løgreglustøðini í Havn.

Vaktleiðarin leggur afturat, at hóast nógv jólaborðhald hava verið kring landið, hevur tað verið øgiliga friðarligt í náttarlívinum.

Onkur fólk eru gliðin í hálkuni, og eisini hava verið støður, har løgreglan hevur verið noydd at skilja fólk sundur, men talan hevur ikki verið um nakran bardaga ella harðskapsmál, verður upplýst.

Í nátt mátti løgreglan eisini hjálpa einum manni, sum lá úti og var so drukkin, at hann ikki kláraði at finna heim. Tá løgreglan kom á staðið var hann so óhøviskur, at løgreglan tók hann við sær á støðina.

Løgreglan fekk seinni fatur á fólki, sum kundu koma eftir honum, og síðani varð hann leyslatin við einari skuldseting fyri brot á skilhaldsreglurnar.