Skulu ikki undirmeta Russland

Í farnu viku tók Russland her sín úr Kherson-økinum í Ukraina, og í hesum sambandi ávarar Jens Stoltenberg, aðalskrivari hjá Nato ímóti at undirmeta Russland.

Hann sigur, sambært DR, at Russland framvegis hevur stóran kapasitet og nógv fólk, og hevði tað verið eitt mistak at undirmett russar.

– Komandi mánaðirnar verða torførir. Málið hjá Putin er at lata Ukraina vera kalt og myrkt hendan veturin, so vit mugu halda kós, sigur hann.

Eisini sigur Stoltenberg, at tað er upp til ukrainar at avgera, nær og hvussu teir vilja samráðast við russar um at fáa ein enda á krígnum.

– Tað er upp til Ukraina at avgera, hvørjar treytir, tey kunnu góðtaka. Tað, vit eiga at gera, er at stuðla Ukraina og styrkja teirra hond, so har einaferð kunnu vera samráðingar, har Ukraina fer at sigra sum ein sjálvræðin tjóð í Evropa, sigur hann.