Smyril trupulleikar við motorinum – Broytt ferðaætlan restina av degnum

Smyril fekk fyrr í morgum tekniskar trupulleikar við einum av teimum fýra høvuðsmotorunum, tá ið skipið var á veg til Havnar, og tí hava seinkingar verið á Suðuroyarleiðini í morgun.

Strandferðslan skrivar, at umvælingin av trupulleikanum fer at taka millum átta og 12 tímar, og tí verður ferðaætlanin broytt í dag.

Siglt verður soleiðis restina av degnum.

• Av Havnini kl. 11:00
• Úr Suðuroy kl. 14:00
• Av Havnini kl. 17:00

Síðani verður ikki siglt meir fyri dagin.

Strandferðslan skrivar eisini, at vegna vána veðurforsøgn í dag og í morgin, kunnu broytingar og/ella avlýsingar væntast á øllum leiðum.