Sonur Harry og Meghan doyptur

Í gjár var skipað fyri einum privatum hátíðarhaldi, har yngsti limurin í bretska kongshúsinum varð doyptur.

Tveir dagar eftir, at hertogafrúan Meghan hevði átt, var longu kunngjørt, at fulla navnið hjá soni hennara og Harry prinsi fór at verða Archie Harrison Mountbatten-Windsor, men í gjár varð hann so doyptur, tveir mánaðar gamal.

Lítli Archie varð doyptur í sama kjóla sum systkinabørn hansara - prinsarnir George og Louis, og Charlotte prinsessa, skrivar Politiken.

Mynd: EPA

Við til dópin vóru m.a. William prinsur saman við konu og børnum, Charles prinsur og kona hansara Camilla, mamma Meghan, Doria Ragland, og Jane Fellows og Sarah McCorquodale, systrar hjá Dianu prinsessu, sálu.

Elizabeth drotning var ikki við til dópin, tí at hon, sambært kongshúsinum hevði aðrar uppgávur.

Harry prinsur og hertogafrúan Meghan vórðu gift á Windsor slottinum í fjør. Sonur teirra varð føddur 6. mai, og er hann sjeyndi í arvarøðini til bretsku trónuna.