Spaniólar skulu á val fyri fjórðu ferð í fýra ár

Virkandi forsætisráðharrin í Spania kunngjørdi týsdagin, at nýval verður útskrivað, eftir at royndin at skipa stjórn miseydnaðist.

Sosialistaflokkurin hjá Sanchez, PSOE, var annars stórsti flokkur til valið í apríl, men enn hevur tað ikki eydnast at semjast um ein meiriluta í tjóðartinginum, og harvið at skipa stjórn.

Sanchez hevur fyrr í mánaðinum havt samráðingar við vinstrahalla flokkin, Podemos, men tær samráðingarnar bóru ikki á mál. Ein onnur møgulig samgonga við flokkin Ciudadanos, ið liggur til høgru fyri miðjuna, rakk heldur ikki á mál. 

Sanchez hevði freist til 23. september, at fáa skipa stjórn, men hann hevur nú slept royndunum, og hevur tískil útskrivað nýval, ið verður hildið 10. november.