Springari á Kappanum

Ein springari, sum Havstovan merkti í Norðragøtu 30. august, hevur ferðast longu leiðina til Eysturgrønlands, og er nú í ein landsynning úr Kappanum, skrivar Havstovan.

– Hesin springarin dvaldi bert stutta tíð í føroyskum sjógvi, áðrenn hann byrjaði ferðina vestur móti Íslandi og víðari til Grønlands. Eftir at hava verið eina tíð út fyri hellingini suður av Danmarkarstrætinum, ferðaðist hann suður eftir fram við landgrunninum, og suður í Irmingarhavið. Sendarin hevur nú virkað í 84 dagar.

Ein annar springari, sum varð merktur í Fuglafirði 10. juni, og sum sendir enn, hevur mest sum alla tíðina hildið til í Føroyskum sjógvi, skrivar Havstovan.

– Hann hevur ferðast nakað suður og norð í Hetlandsrennuni, men hevur seinastu tíðina verið mest sunnarlaga í rennuni og á Bankarygginum. Eisini hevur hann gjørt okkurt rend inn á Munkagrunnin og vestur móti Føroyabanka. Hesin sendarin hevur nú virkað í 154 dagar.