ST: Russland avrættað 77 sivilfólk undir krígnum

Undir krígnum í Ukraina hevur Russland avrættað 77 sivilfólk, sum hava verið afturhildn uttan nærri frágreiðing, vísir frágreiðing hjá ST, sum varð útgivin týsdagin.

Talan sigst at vera um 72 menn og fimm kvinnur. Umframt hetta doyðu tveir mans, eftir at teir vórðu píndir og fingu noktað læknahjálp.

Frágreiðingin, sum byggir á 1.136 samrøður við offur, vitni og onnur, hevur skjalprógvað tilsamans 864 tilvildarligar handtøkur av sivilfólki. Handtøkur uttan nakra frágreiðing.

Tað er eisini skjalprógvað, at ukrainar hava framt 75 tilvildarligar handtøkur, og at yvir helvtin av teimum handtiknu vórðu útsett fyri píning, men sambært Ritzau hava eingi prógv verið um, at ukrainar skulu hava avrættað sivilfólk.