Stella Maris verður sløkt

Franciskanarasystrarnar í Havn byrjaðu vøggustovu í 1958, og síðan 1965 hevur Stella Maris vøggustovan hildið til í stóru sethúsunum við Varðagøtu hinumegin Sankta Jósefs barnagarð og nærindis Sankta Frans skúla. Stovnurin hevur pláss fyri nakað oman fyri 40 børnum.

Tórshavnar kommuna yvirtók stovnin og virksemið í ár 2000, og um tvey ár verður stovnurin stongdur.

– Bygningurin krevur stóra høvuðsumvæling og er ikki longur tíðarhóskandi til dagstovnavirksemi. Bygningskrøv gera, at tað samstundis verður neyðugt at lækka talið á plássum. Kommunan hevur tí gjørt av ikki longur at taka fleiri børn inn á stovnin, sigur kommunan, sum longu hevur kunnað starvsfólk og foreldur um avgerðina.

Børnini, sum byrja á stovninum í august, verða tey síðstu, og til ber ikki longur at bóka vøggustovupláss í Stellu Maris í skipanini BARN.

Samstundis boðar kommunan tó frá, at fleiri nýggj vøggustovupláss verða skipað á øðrum stovnum. 

Í miðbýnum verður verandi skúli í Kongagøtu gjørdur um til dagstovn og lagdur afturat Miðstovninum. Hesi pláss verða boðin út í BARN, so skjótt tíðarætlan fyri umbyggingina er tøk.

Býlingshúsið vesturi á Flat letur eisini nýggja vøggustovu upp eftir summarfrítíðina. Til ber at bóka hesi pláss í næstum.