Stór norðurlendsk ráðstevna um læraraútbúgvingar

Í døgunum 2. mai til 5. mai verður stór norðurlendsk ráðstevna um læraraútbúgvingar á Námsvísindadeildini á Fróðskaparsetri Føroya

Høvuðsevnið á ráðstevnuni er “Innovatión í undirvísing og læring”, og endamálið við ráðstevnuni er at styrkja norðurlendskt samstarv og sínámillum vitanarútbýting við støði í gransking, royndum og praksis á økjum, sum eru viðkomandi fyri læraraútbúgvingar.

Málbólkurin fyri ráðstevnuna eru granskarar og undirvísarar á læraraútbúgvingum í Norðurlondum, og umleið 250 luttakarar verða við á ráðstevnuni, umboðandi Noreg, Svøríki, Danmark, Finnland, Føroyar, Grønland og Ísland, skrivar heimasíðan hjá Fróðskaparsetrinum.

Fyrsta Norðurlendska Læraraútbúgvingarráðstevnen varð hildin í 1991, og síðani hevur tað verið siðvenja at halda slíkar ráðstevnur annaðhvørt ár í einum av Norðurlondunum. Seinast Føroyar vóru ráðstevnuvertir, var í 2006. Ráðstevnan í ár verður tann 16. av hesum slagnum.

Millum føroysku luttakararnar á ráðstevnini eru tey, sum dagliga starvast á Námsvísindadeildini og sum varða av føroysku læraraútbúgvingini. Harumframt eru umboð fyri eitt nú Magistarafelagið og Føroya Lærarafelag boðin við. Nógv tann størsti parturin av luttakarunum eru tó útlendingar.