Stór skalvalop rakt bygdir á Vestfirðum í Íslandi

Áleið midnátt vórðu tvær bygdir raktar av trimum skalvalopum á Vestfirðum. Tvey vóru á Flateyri og eitt á Suðureyri. Tað seinna lopið á Flateyri rakti eini hús, og ein ung genta noyddist at bjargast úr teimum. Eingin mansskaði hendi, men ymiskur materiellur skaði hevur verið í bygdunum. 

Bjargingarfólk komu skjótt á staðið, og bjargingarlið eru í økinum, um okkurt skuldi hent aftur. Undantaksstøða er lýst í lítlu bygdunum. Á Flateyri sleppa fólk ikki út, meðan á Suðureyri eru íbúgvarnir bidnir um at halda seg frá havnaøkinum. Hetta skrivar Morgunblaðið


Har skalvalopini hendu (Mynd: mbl.is)

Vestfirðir er ein hálvoyggj í útnyrðingspartinum av Íslandi. Tað er ikki so óvanligt, at skalvalop henda í økinum. Í 1995 var eitt sera stórt av slagnum á Flateyri. 45 fólk vórðu undirgravað og 20 doyðu. 29 hús vórðu oyðiløgd. Hetta gjørdi, at ein verja móti slíkum varð bygd, og mett verður, at hetta hevur hjálpt stórliga hesaferð.