Størsta ukrainska dronuálopið á Moskva

Í morgun varð steðgur í flogferðsluni á trimum floghavnum nærindis russiska høvuðsstaðin Moskva, eftir at 34 dronur vórðu skotnar niður av russisku loftverjuni í økinum.

Sambært Reuters er talan um tað higartil størsta ukrainska dronuálopið á Moskva. Frammanundan var tað higartil størsta álopið framt í september, tá 20 dronur vórðu skotnar niður.

Floghavnirnar, sum vórðu ávirkaðar av álopinum tíðliga í morgun, vóru Domodedovo, Sjeremetevo, og Zhukovsky-floghavnin, men flogferðslan koyrir nú aftur sum vanligt, skrivar Ritzau.

Tilsamans 70 dronur vórðu skotnar niður yvir seks russiskar landslutir. Ein persónur hevur fingið skaða.