Stórur og bulmikil gestur á vitjan í Vágum

Eitt risastórt flutningsflogfar hjá bretska Royal Air Force var fyri løtu síðani á vitjan í Vága Floghavn.

Hetta er størsta flogfar, ið hevur vitjað í Vágum. Sama flogfar, ella eitt av sama slag, var fyri fyrstu ferð í Vágum í mars mánaði.

- Talan er um venjingar fyri at venja manningina til at lenda og fara á flog á lutfalsliga stuttum og smølum breytum, har topografiin kann vera avbjóðandi, greiðir Regin I. Jakobsen, flogvallastjóri frá.

Flogfarið er av slagnum Boeing C-17 Globemaster III við fýra jet-motorum hangandi undir veingjunum.

Hetta eru flogfør, ið kunnu flúgva við stórari og tungari last, ongin trupulleiki er at flyta stórar maskinur við hesum flogfarinum, tær kunnu koyra umborð.

Regin I. Jakobsen greiðir til sammetingar frá, at tá størsta flogfarið hjá Atlantsflog er fultlastað, vigar tað 79 tons. Hetta flogfarið kann viga upp í 265 tons. Sjálvt flogfarið vitar 125 tons, og so kann tað taka 130 tons umborð afturat. So talan er um eitt ógvusligt flogfar, sammett við A-320 hjá Atlantsflog.

Áðrenn bretska hernaðarflogfarið setti, seg fleyg tað nakrar ferðir runt og nærkaðist flogvøllinum frá báðum síðum fyri síðan at seta ferðina uppaftur.

Hetta gjørdi flogfarið eisini, tá tað vitjaði fyrr í ár. Nakað fyri klokkan 13 setti tað seg so á flogvøllin, stóð á norðara enda eina løtu, og fór so á flog aftur suðuryvir.

Í skrivandi stund er tað aftur farið at sveima rund í loftrúminum yvir Vága Floghavn, so nakrar royndir skulu helst gerast afturat áðrenn tað leggur leiðina suðuryvir aftur.

Greinin og góðar myndir frá vitjanini í mars kann síggjast á heimasíðuni hjá Vága Floghavn. Les: Størsta flogfar nakrantíð í Vágum