Óviðkomandi akfør, ið parkera ólógliga á økinum við bilrøðirnar til Smyril, skapa nærum dagliga ruðuleika hjá teimum ferðandi við bili.
Tað skrivar Strandferðslan í fráboðan á heimasíðuni.
– Tíverri er tað gerandiskostur, at fólk seta bilar, bussar, lastbilar og onnur akfør frá sær á økinum við Eystari bryggju, ið einans er ætlað til ferðsluna til Smyril og Norrønu. Økið er annars týðiliga avmerkt við skeltum við fráboðan um, at óviðkomandi onki hava at gera á økinum.
– Hóast hetta standa akfør dagliga parkerað á, og runt um bilrøðirnar og skapa ruðuleika, tá ið ferðafólk við bili skulu stilla seg í bíðirøðirnar. Tí endar bíðirøðin til Smyril alt ov ofta úti á alfaravegi, ið tarnar ferðsluni rundanum havnarlagið.
(Mynd: ssl.fo)
Strandferðslan heitir á øll um at lata vera við at seta akfør frá sær á økinum, um tað ikki er í sambandi við fráferð hjá ferjunum.
Strandferðslan upplýsir eisini, at óviðkomandi parkering og ferðsla á økinum framyvir verður fráboðað løgregluni.
Vinarliga broyt tínar kennifíla - og privatlívsstillingar fyri at síggja hetta innihald