Alda Nielsdóttir
Tað er líkt til, at suðurkoreanski forsetin, Yoon Suk-yeol sleppur undan einum ríkisrættarmáli, eftir at hann lýsti undaktaksstøðu í landinum týsdagin.
Leygardagin eydnaðist tað ikki suðurkoreanska tjóðartinginum at savna ein meiriluta fyri at reisa ríkisrættarmál móti forsetanum. Hetta er heldur ikki óvantað, eftir at nærum allir limir í konservativa stjórnarflokkinum PPP fóru úr tingsalinum undan atkvøðugreiðsluni.
Fyri at reisa ríkisrættarmál móti forsetanum krevst undirtøka frá tveimum triðingum av tjóðartinginum - 200 av 300 limum.
Andstøðan hevur 192 umboð í tinginum, og tí varð neyðugt við undirtøku frá átta umboðum úr stjórnarflokkinum fyri at samtykkja uppskotið. Bert 195 luttóku í atkvøðugreiðsluni, og varð hon tí ógildað, skriva fleiri altjóða miðlar í dag.
Umboð fyri demokratiski andstøðuflokkin boða frá, at flokkurin fer at halda á við royndunum um at fáa reist eitt ríksirættarmál móti forsetanum.
Vinarliga broyt tínar kennifíla - og privatlívsstillingar fyri at síggja hetta innihald