Svansi-Bob er fyrsta bókin hjá Joan Waag Høgnesen

Svansi-Bob er ein spildurnýggj myndabók, sum Joan Waag Høgnesen hevur skrivað. Hans Jacob Østerø hevur myndprýtt.

- Hetta er ein herlig og svansut søga við stuttligum myndum
um svanga grísin Bob, sum fer sín fyrsta túr inn í býin at fáa sær okkurt lekkurt at eta.

Soleiðis lýsir Bókadeild Føroya Lærarafelagsins nýggju bókina, sum er tann fyrsta hjá Joan Waag Høgnesen.

Í hesum sambandi skipar Bókadeild Føroya Lærarafelags fyri útgávutiltaki fyri børn á barnabókasavninum í Havn leygardagin 31. august klokkan 15.

Joan fer at lesa søguna, og Christina Eriksen fer at syngja nakrar barnasangir.

- Aftaná fáa øll okkurt søtt og lekkurt, og møguleiki verður at keypa bókina. Høvi
verður eisini at hitta rithøvundin og myndprýðaran, og bæði Joan og Hans Jacob kunnu skriva í bøkurnar.

Mynd: Bókadeild Føroya Lærarafelags

Joan er námsfrøðingur og arbeiðir í frítíðarskúlanum á Argjahamri. Hon býr á Argjum, og Svansi-Bob er hennara fyrsta bók.

Hans Jacob býr í Klaksvík. Hann hevur útbúgving í margmiðlasniðgeving og arbeiðir millum annað sum fríyrkismyndprýðari.