Uttanlands

Svii ákærdur fyri at njósnast fyri Russland

Talan er um ein 47 ára gamlan mann, sum sigst at hava fingið 28.000 svenskar krónur frá einum starvsfólki á russisku sendistovuni afturfyri viðkvæmar upplýsingar, sum hann fekk gjøgnum sítt arbeiði hjá Volvo og Scania

Mynd: Säkerhetspolisen

Mynd: Säkerhetspolisen

2021-02-22 15:41 Author image
Alda Nielsdóttir
placeholder

Ein 47 ára gamal svii er skuldsettur fyri at njósnast fyri Russland. Tað upplýsir svenski ákærumyndugleikin.

Talan er um ein svenskan ráðgeva, sum í einum longri tíðarskeiði hevur latið einum russiskum sendimanni viðkvæmar upplýsingar, sum hann hevði fingið í sambandi við arbeiði hjá Scania og Volvo.

Maðurin varð tikin av svenska Säkerhetspolisen á eini matstovu í Stockholm í 2019. Hetta var í sambandi við, at hann í áravís hevði verið undir illgruna fyri njósning. Á matstovuni hitti hann eitt starvsfólk á russisku sendistovuni.

Sambært Säkerhetspolisen var viðkomandi í veruleikanum frá russisku fregnartænastuni.

Sambært ákæruritinum hevði 47 ára gamli maðurin fingið góða løn fyri upplýsingarnar. Ritzau skrivar, at hann skal hava fingið 28.000 svenskar krónur.

placeholder
placeholder