Svøríki: Verður væntandi Nato-limur í morgin

Svøríki verður væntandi innlimað í vesturlendsku hernaðarsamgonguna Nato í morgin.

Tað skrivar svenska TT tíðindastovan í dag, tó uttan at nevna hvørjar keldurnar eru.

Roknað verður við, at Ungarn í morgin fer at senda lata inn sína góðkenning av svensku Nato-umsóknini til USA.

Svenska stjórnin hevur í dag boðað frá, at Ulf Kristersson, forsætisráðharri, og Tobias Billström, uttanríkisráðharri, í dag eru farnir til Washington D.C. í sambandi við at umsóknin um limaskap nú væntandi verður endaliga staðfest.

Svenska kringvarpið SVT skrivar, at flogfarið við Kristersson og Billström umborð, fór úr Arlanda floghavnini í Stockholm klokkan 14.30 lokala tíð í dag.

- Hetta kann ikki tulkast øðrvísið enn, at stjórnin er rættiliga vís í, at Ungarn fer at lata skjølini inn í Washington í morgin, sigur Mats Knutson, sum er politiskur viðmerkjari hjá SVT.

Tað var á vári í 2022, stutt eftir russisku innrásina í Ukraina, at Svøríki saman við Finnlandi sendi inn umsókn um at gerast limur í verjusamgonguni.

Finnland gjørdist limur í apríl í fjør. Men Svøríki hevur bíðað í næstan eitt heilt ár afturat áðrenn umsóknin varð góðtikin av øllum limalondunum.

Øll limalondini í Nato skulu góðkenna umsóknir frá nýggjum londum at gerast limir í verjusamgonguni. Hesaferð settu bæði Turkaland og Ungarn seg ímóti, at Svøríki gjørdist limur.

Turkiska tjóðartingið góðkendi svensku umsóknina í januar. Orsøkin til at Turkaland drálaði var eitt nú orsaka av, at Turkaland heldur, at svenska stjórnin hevur stuðlað ella hjálpt leiðandi limum í kurdiska arbeiðaraflokkinum, PKK, sum er á listanum hjá ES yvir yvirgangsfelagsskapir.

Nývaldi forsetin í Ungarn, Tamás Sulyok, skrivaði í gjár undir ungarsku góðkenningina av, at Svøríki gerst Nato-limur.

Í Ungarn hevur misnøgd verið um, at Svøríki hevur havt at Ungarn fyri eitt nú ikki at halda galdandi galdandi aðalreglur fyri at vera rættarstatur, skrivar Ritzau.