Ingi Samuelsen
Eitt ísraelskt loftálop hevur stongt floghavnina í sýriska býnum Aleppo, og hevur harvið støðgað neyðhjálpina til tey neyðstøddu eftir ógvusliga jarðskjálvtan í farna mánaði.
Tað sigur sýriska verjumálaráðið, sambært AFP tíðindastovuni. Tað er lendingabreytin á flogvøllinum, sum hevur fingið skaða, verður sagt. Sýriska loftverjan upplýsir, at tey hava skotið fleiri álopsrakettir í nátt, skrivar finska kringvarpið, YLE.
Ísraelska hervaldið hevur ikki gjørt viðmerkingar til ákærurnar.
- Tað er ikki gjørligt at taka ímóti neyðhjálp, fyrr enn skaðin er bøttur, sigur ein talsmaður fyri sýriska samferðslumálaráðið við AFP.
Meira enn 50.000 fólk lótu lív í jarðskjálvtanum í Sýria og Turkalandi.
Henda seinasta mánaðin eru yvir 80 flogfør við neyðhjálp lend í floghavnini í Aleppo.
Ísrael hevur fleiri ferðir hesi seinastu árini bumbað floghavnina í Aleppi. Í september vóru ísraelsk álop orsøk til at floghavnin ikki kundi brúkast í fleiri dagar.
Tað kemur tó ikki ofta fyri, at Ísrael fremur málrættað álop móti Sýria.
Men stjórnin í Jerusalem hevur sagt seg vilja halda fram við alopunum fyri at støðga Iran í at vinna land í Sýria, skrivar AFP.
Vinarliga broyt tínar kennifíla - og privatlívsstillingar fyri at síggja hetta innihald