Takkaði Mikael Jóhan Heinesen fyri arbeiði hansara

Eftir at hava starvast sum lærari í Tofta skúla síðan 1986, hevur Mikael Jóhan Heinesen valt at gevast sum lærari.

Mikael Jóhan flytir niður til Danmarkar við familjuni, og í hesum sambandi var lítil samkoma hósdagin, har borgarstjórin í Nes kommunu, Súni í Hjøllum, nýtti høvi vegna kommununa, at takka Mikael Jóhan Heinesen fyri arbeiði hansara.

Mikael Jóhan hevur verið serstakliga virkin í nærumhvørvinum. Umframt at vera lærari, hevur hann eisini verið røktingarmaður, kórleiðari og organistur.

Borgarstjórin takkaði honum fyri hansara stóra arbeiði at menna ta lokalu sang- og tónleikamentanina í heimliga umhvørvinum, og fyri, at hann hevði verið so góður at heita á, tá kommunan skipaði fyri tiltøkum, har sangur og tónleikur skuldi framførast, skrivar Nes kommuna.