Talibanleiðari tosaði við fólkið fyri fyrstu ferð

Ovasti leiðarin hjá Taliban, Haibatullah Akhundzada, tosaði herfyri við almenningin fyri fyrstu ferð. Tað skriva fleiri altjóða miðlar.

Ikki er greitt, júst nær hetta hendi, men tað var í afghanska býnum Kandahar, at hann tosaði við Taliban-stuðulsfólk.

Í einum ljóðfíli, sum er vorðin deildur á sosiala miðlinum Twitter av høgtstandandi limum í Taliban, verður boðað frá, at Haibatullah Akhundzada talaði frammanfyri einari stórari mannamúgvu við einum skúla. Síðan hoyrist røðan hjá Akhundzada.

– Má gud løna kúgaða fólkið í Afghanistan, sum stríddist ímóti teimum vantrúgvandi og kúgarunum í 20 ár. Eg ætli mær at biðja fyri tykkum, og fáa tykkum at biðja fyri mær, hoyrir mann hann m.a. siga á ljóðfílinum.

Ongar myndir ella videobrot frá tiltakinum eru sædd.

Hetta er fyrstu ferð, at Akhundzada tosar við almenningin, eftir at Taliban í august tók valdið í Afghanistan. Ongar myndir ella videobrot eru sædd av hendingini.

Akhundzada hevur verið leiðari í Taliban síðan 2016, tá undanmaður hansara varð dripin í einum dronuálopi.