Talið á smittaðum í Kina næstan komið upp á 12.000

Seinasta samdøgrið eru fleiri enn 2000 corona-tilburðir og 46 deyðsføll afturat staðfest í Kina.

Hetta upplýsir kinesiska heilsumálaráðið í morgun.

Talið á smittaðum í landinum er sostatt komið upp á 11.791, meðan deyðstalið er komið upp á 259.

Eisini eru fleiri tilburðir afturat staðfestir uttanfyri Kina, og mett verður nú, at coronavirusið er staðfest í í minsta lagi 20 øðrum londum.

Virusið, sum sigst at stava frá kinesiska býnum Wuhan, hevur spreitt seg til átta evropeisk lond – Týskland, Frakland, Svøríki, Finland, Ongland, Russland, Italia og Spania.

Orsaka av virusinum hevur Kina stongt eina rúgvu av handlum og øðum støðum, sum draga ferðafólk at sær. Eisini er flogferðslan til og úr Wuhan avmarkað.

Fleiri onnur lond hava boðað frá innferðarforboði úr Kina, m.a. USA, sum í gjár boðaði frá, at útlendingar, sum hava verið í Kina innan seinastu tvær vikurnar, ikki sleppa inn í landið.

TV2 skrivar, at fýra danir vórðu fluttir heim úr Kina í gjár, men at eingin teirra er smittaður. Fleiri onnur verða eisini flutt aftur til Danmarkar úr Kina um vikuskiftið, og verða tey síðani eisini kannaði fyri coronavirusið.