Tekur eitt samdøgur áðrenn flogferðslan er komin á pláss aftur

Í gjárkvøldið komu flogskipararnir, sum síðani síðsta fríggjadag hava verið í verkfalli og skandinaviska flogfelagið SAS ásamt um ein nýggjan trý ára sáttmála, sum gevur flogskiparunum starvstrygd og ein samlaðan lønarvøkstur á 11 prosent.

Tað merkir, at SAS flogførini nú eru farin á flog aftur, og flogfarið til Føroyar er, sambært heimasíðuni hjá Vága Floghavn sett at koma í Vágar kl. 12.15 í dag og fara avstað aftur kl. 13.05.

Men tað tekur okkurt um eitt samdøgur áðrenn flogferðslan er komin í rættlag aftur, upplýsti SAS í gjárkvøldið.

Tilsamans 1409 flogskiparar hava verið í verkfalli. Talan er um flogskipar í danska felagnum Dansk Pilotforening, norsku feløgunum Norsk Flygerforbund og Parat og svenska felagnum Svensk Pilotföening. Avtalan, sum varð undirskrivað í gjárkvøldið skal til atkvøðugreiðslu hjá limunum í trimum av hesum feløgunum áðrenn sigast kann, at ósemjan er avgreidd.

Umleið 4.000 flogferðir hava verið avlýstar hesar dagarnar, verkfallið hevur vart, og tað hevur rakt yvir 380.000 ferðafólk.