Tjóðveldi heldur floksting um vikuskiftið

Floksting Tjóðveldis 2022 verður í Mentanarhúsinum í Fuglafirði fríggjadagin 29. og leygardagin 30. apríl.

Flokstingið byrjar fríggjakvøldið, tá Rógvi Nybo aðalstjórnarformaður setir tingið. Síðan  verður flokstingið skipað við tingformanni og tingskrivara, og sum siður er verður yvirlýsingartoymi valt.

Á skránni fríggjakvøldið er framløga av roknskapi, umrøða av innkomnum málum og atkvøðugreiðsla. Fríggjakvøldið endar við vali álitisfólkið í aðalstjórn og grannskoðara.

Flokstingið heldur áfram leygarmorgunin við morgunmati. Kl. 9.30 verður formansfrágreiðing, og eftir formansfrágreiðingina verður politiskt orðaskifti um formansfrágreiðingina og politisku mál floksins. Unga Tjóðveldið leggur frágreiðing fram kl. 11.30

Eftir matarsteðg á middegi heldur politiska orðaskfti fram. Seinnapartin klokkan 14 verða innlegg við gestarøðara, evni er: Tjóðveldi og hvussu flokkurin klárar seg í politiska meldrinum. Gestarøðari er Elisa Vang.

Formansrøðan verður stroymd á heimasíðu og facebook síðu floksins.

Um kvøldið verður veitsla fyri øllum tjóðveldishugaðum, eisini í Mentanarhúsinum, góður matur, felagssangur, undirhald, røður og felagssangur. Eftir borðhaldi verður føroyskur og enskur dansur.