Floksting Tjóðveldis 2021 verður í marghøllini í Sørvágs skúla í vikuskiftinum - dagnarnar 21. og 22. mai - undir heitinum: “Sjálvbjargið fólk, vinna og vælferð”
Fríggjakvøldið verður skipanarparturin avgreiddur, og leygardagin setur Tjóðveldi kikaran á, hvussu vit virða og virka okkara ríka livandi náttúrutilfeingi: Hvussu vit skulu umsita tað burðardygt, og hvussu vit kunnu fáa nógv meira virði burturúr, til tess at skapa ein sjálvberandi búskap og eitt sjálvbjargið fólk við bestu matvøruframleiðslu.
- Tjóðveldi vil við hesum leggja dent á teir partar av okkara vinnu og framleiðslu, sum í politisku skipanini støðugt verða gloymdir, goymdir burtur og fáa vánaligar sømdir.
Talan er, sambært tíðindaskrivinum frá Tjóðveldi, um virðisøkingina á fiskavirkjunum kring landið, útróðrarvinnuna og at virka dygdarmatvørur úr okkara egna tilfeingi.
Triggir gestarøðarar fara at siga sína erligu hugsan um støðuna og geva íblástur og boð uppá, hvat vit eiga at gera. Talan er um Jens Martin Knudsen, framleiðslustjóra á fiskavirkinum Vaðhorn á Strondum, Finnbjørn Vang, ið er formaður í Meginfelag Útróðrarmanna, og Gunnhild Dahl Niclasen, sum á fleiri pallum slóðar fyri og starvast við burðardyggari matvøruframleiðslu.
Formansfrágreiðingin hjá Høgna Hoydal verður leygarmorgunin klokkan 09.30.
18.00 Kvøldseta
Vinarliga broyt tínar kennifíla - og privatlívsstillingar fyri at síggja hetta innihald