Ingi Samuelsen
Ein bilførari misti koyrikortið treytað og tveir fingu klipp í koyrikortið og bót fyri at koyra ov skjótt, tá løgreglan gjørdi ferðmátingar í Eysturoynni fyrrapartin í gjár.
Nakað eftir klokkan 10 var ferðin mátað á landsvegnum millum Fjarða, og her varð ein bilførari skrásettur, sum koyrdi 108 kilometrar um tíman. Klipp og bót.
Um hálvgun ellivutíðina varð ferðin mátað á Fuglafjarðarvegnum, og her vórðu tveir bilar skrásettir at koyra alt ov skjótt.
Annar koyrdi 105 km/t – tað gevur klipp og bót. Hin koyrdi 117 km/t, sum gevur treytaða frádøming.
Harafturat avdúkaði ferðsluløgreglan tríggjar bilførarar, sum tosaðu í telefon undir akstri. Her er revsingin júst hækkað til klipp í koyrikortið og 1.500 krónur í bót.
Í nátt hevur løgreglan eisini verið úti og tikið nummarplátur av bilum, sum standa í eftirstøðu fyri eitt nú vektavgjald. Átta sett av plátum vórðu tikin í Eysturoynni og Norðoyggjum, upplýsir vaktleiðarin á løgreglustøðini.
Vinarliga broyt tínar kennifíla - og privatlívsstillingar fyri at síggja hetta innihald