Tríggir konservativir politikarar takka farvæl

Tríggir tjóðartinglimir í Bretlandi hava nú tikið avgerð um at fara úr Konservativa flokkinum hjá Theresa May. Hetta hendir eftir at átta tjóðartinglimir hjá Labour í gjár fóru úr flokkinum og savnaðust í einum sjálvstøðugum bólki í bretska tjóðartinginum.

Anna Soubry, Heidi Allen og Sarah Wollaston boðaðu í dag frá, at tær fara úr Konservativa flokkinum og fara uppí sjálvstøðuga bólkin, sum teir átta savnaðust í í gjár.

Tær tríggjar eru allar fyri at Stórabretland framhaldandi verður í ES og eru ónøgdar við at Theresa May í stóran mun arbeiðir við Brexit-samráðingunum saman við einum bólki av konservativum, sum eru sera jaligir um at fara úr ES.