Tropisk ódn rakt Filipsoyggjarnar á jólum

Í minsta lagi 20 fólk hava latið lív í Filipsoyggjunum, eftir at oyggjalandið varð rakt av eini tropiskari ódn seint jólaaftan.

Sambært DR, hendu øll deyðsføllini í Visayas-økinum.

Jólaaftan vórðu fleiri enn 10.000 fólk flutt burtur orsakað av harðliga vindinum og regninum. Eisini fór streymurin í fleiri býum.

Ódnin Phanfone herjaði við 54,1 m/s, og fleiri húsatekjur fóru í vindinum. Í støðum er heldur einki telefon- ella netsamband.

Í miðal verða Filipsoyggjarnar raktar av 20 ódnum og stormum um árið, og í nógvum førum doyggja fólk í illveðrinum. Eitt dømi um hetta er tropiska ódnin Haiyan, sum rakti oyggjalandið í 2013. Tá lótu uml. 7.300 fólk lív.