Trump farin úr Washington

Fyrr í dag fór Donald Trump forseti og Melania Trump úr Hvítu húsunum við tyrlu til Joint Base Andrews hernaðarfloghavnina uttan fyri Washington, har hann helt sína seinastu røðu sum sitandi forseti.

- Hetta hava verið fýra fantastisk ár, segði Donald Trump millum annað í røðuni.

Av pallinum nevndi hann tey nógvu avrikini, sum hann saman við umsitingini hevur fingið frá hondini í forsetaskeiðinum. Eitt nú styrkt hervald, nýggja rúmdarætlan, endurreisn av partabrævamarknaðinum og eina trygging av búskapinum áðrenn koronafarsóttin rakti.

- Vit gjørdu størstu skattanýskipanina nakrantíð í landsins søgu. Eg vóni ikki, at tey fara at hækka skattirnar aftur. Men gera tey tað, so hevði eg ávarað tykkum, segði Trump.

Hann heldur sostatt, at Biden-umsitingin hevur fingið best møguligar fyritreytir til eina góða byrjan.

Kemur aftur
Fráfarandi forsetin lovaði sínum áhoyrarum, at tey “fóru at koma aftur í onkrum formi”, men kom ikki nærri inn á, hvat hann meinti við tí.

- Havið eitt gott lív, vit síggjast skjótt, segði Trump at enda.

Hóast Donald Trump hevur brotið siðin um at vera til staðar í sambandi við forsetaskiftið, so helt hann kortini ein annan sið, sum er vanligur ein dag sum henda.

Eins og undangongumenn sínar, hevur Trump lagt eitt bræv til Biden í eggformaðu forsetaskrivstovuni í Hvítu húsunum.

Tað váttar Judd Deere, talsmaður í Hvítu húsunum fyri Washington Post í dag.

Seinasta røðan til fólkið
Í gjárkvøldið helt Donald Trump sína seinastu forsetarøðu til tjóðina, ið varð send í sjónvarpi.

Røðan kann lesast her 

Uttan at nevna Joe Biden við navni eina tí einastu ferð, so egði Trump, at hann “biður fyri”, at nýggja umsitingin fær hepni í sínum starvi.

Flytir til Florida
Tá Joe Biden verður tikin í eið í Washington D.C. lendir Donald Trump á sínum fyribils seinasta túri við Air Force One-forsetaflogfari í floghavnini nærhendis hansara egna golf-frítíðarstaði Mar-a-Lago í Florida.

Hildið verður, at hann og familjan fara at búgva har komandi tíðina. Fleiri amerikanskir miðlar hava skrivað, at Trump og familjan væntandi flyta fast til sólríka statin.