Alda Nielsdóttir
Við at náða son sín, Hunter Biden, hevur amerikanski forsetin, Joe Biden misnýtt valdið hjá sær.
Tað skrivar komandi amerikanski forsetin, Donald Trump í dagføring á sín egna sosiala miðil, Truth Social.
Les eisini: Joe Biden náðar sonin, Hunter Biden
– Umfatar náðingin, sum Joe hevur givið Hunter eisini J-6 gíslarnar, sum nú hava sitið fongslaðir í áravís? Hetta er valdsmisnýtsla og rættarligt órættvísi, skrivar Trump.
"J-6 gíslar" vísir til viðhaldsfólk hjá Trump, sum eru blivin fongslað í sambandi við álopið á Kongressina 6. januar 2021, tá roynt varð at steðga formligu góðkenningina av valúrslitium av forsetavalinum í 2020, har Biden vann á Trump. Sambært Trump var valsvik orsøkin til, at hann tapti valið.
20. januar verður Trump tikin í eið sum forseti, og hann hevur boðað frá, at hann vil brúka vald sítt at náða fólk, sum luttóku í álopinum á Kongressina.
Yvir 1500 fólk eru skuldsett í sambandi við álopið, og nærum 1000 hava játtað seg sek fyri ymisk brotsverk, skrivar Ritzau.
Vinarliga broyt tínar kennifíla - og privatlívsstillingar fyri at síggja hetta innihald