Alda Nielsdóttir
Joe Biden er ein fíggindi. Tað segði fyrrverandi amerikanski forsetin, Donald Trump tá hann í nátt okkara tíð helt røðu í býnum Wilkes-Barre í statinum Pennsylvania.
– Hann er ein fíggindi av landinum. Tit vilja kenna sannleikan. Landsins fíggindi er hann, segði Trump um núverandi forsetan, Joe Biden.
Hetta var eitt aftursvar til Biden, sum í røðu fyrr í vikuni segði, at Donald Trump og ytsti høgravongurin vóru vandamikil fyri amerikanska fólkaræðið. Trump segði hinvegin, at tað eru republikanarar og stuðulsfólk hansara, sum royna at bjarga fólkaræðinum.
– Vandin móti fólkaræðinum kemur frá ytsta vinstravonginum, ikki frá høgravonginum, segði hann.
Í november verður miðskeiðsval í USA, har amerikanska fólkið skal velja umboðsfólk í Senatið og Umboðsmannatingið. Í løtuni hava demokratar meirilutan í Umboðsmannatinginum, og í Senatinum hava demokratar eisini meirilutan við stuðul frá tveimum uttanflokkaumboðum og avgerandi atkvøðuni hjá varaforsetanum, Kamala Harris.
Vinarliga broyt tínar kennifíla - og privatlívsstillingar fyri at síggja hetta innihald