Trump: Vit hava dripið Hamza bin Laden

Í mars lovaði amerikanska stjórnin eina millión dollarar til tann, sum kundi hjálpa við at finna og fanga Hamza bin Laden. Hamza bin Laden var sonur Osama bin Laden, fyrrverandi leiðari í al-Qaeda, og 1. august boðaðu dulnevndar keldur úr CIA frá, at hann var deyður.

Men tá vildi hvørki amerikanskir myndugleikar ella al-Qaeda vátta søguna, og tí var ivasamt, um sonur bin Laden veruliga var deyður.

Nú váttar amerikanski forsetin, Donald Trump, sambært Reuters, at Hamza bin Laden varð dripin av einum amerikonskum herliði.

Ógreitt er, nær Hamza bin Laden varð dripin.