Tvær kvinnur lótu lív í álopi á skúla í Malmö

Tvær kvinnur lótu í gjár lív í einum harðskapstilburði á einum miðnámsskúla í Malmö í  Svøríki.

Tað var seint seinnapartin, at løgreglan var tilkallað til eina hending á Malmö Latinskola. Ein ungur maður leyp á skúlan við øks og knívi, skrivaði svenska TT tíðindastovan.

Fyrstu boðini vóru ógreið, men talan var um “deyðiligan harðskap” inni á Malmö Latinskola, varð upplýst.

Eitt stórt lið av løgreglufólki og fleiri sjúkrabilar vórðu send til staðið, og stutt eftir komu boðini um, at tvey fólk vórðu flutt á sjúkrahús, og at ein triði persónur var handtikin.

Um 50 fólk vóru á skúlanum, tá fráboðanin kom til løgregluna nakað eftir klokkan fimm seinnapartin í gjár, lokala tíð. Talan var um næmingar, sum vandu til ein musical. Tað ganga annars um 1.100 næmingar á latínskúlanum.

Næmingar hava greitt fjølmiðlum frá, at tey stóðu á pallinum og vandu, tá boðini komu um at rýma av skúlanum sum skjótast. Fyrst hildu tey, at onkur skemtaði við teimum, men tá tey sóðu vælmannaða og -brynjaða løgregluliðið, gekk upp fyri teimum, at talan var um ramasta álvara.

Í gjárkvøldið kundi løgreglan í Malmö so boða frá, at tvær kvinnur í hálvtrýssunum høvdu latið lív í álopinum. Talan er um kvinnur, sum starvaðust á skúlanum.

Eisini varð upplýst, at ein 18 ára gamal drongur er handtikin og undir illgruna fyri einsamallur at hava staðið fyri álopinum.

Enn er óvist, hvat orsøkin er til ógvusligu hendingina.

(Mynd: EPA)