Tvey ferðsluóhapp í høvuðsstaðnum

Seinnapartin í gjár um klokkan 17.30 var eitt ferðsluóhapp við R.C. Effersøesgøtu í Havn.

Ein bilur, sum kom koyrandi eftir Bøkjarabrekku frá Steinatúni av, snaraði til vinstru og rendi á eitt gongufólk, sum var á veg yvirum vegin.

Vaktleiðarin á løgreglustøðini í Havn sigur, at viðkomandi ikki fekk stóran skaða men var kortini fluttur á Landssjúkrahúsið til kanningar.

Í morgun varð aftur eitt ferðsluóhapp í høvuðsstaðnum – hesaferð við krossvegin við V.U. Hammershaimbs gøtu og J.C. Svabosgøtu.

Talan var um ein súkklara, sum rendi á ein bil, og viðkomandi fekk nakað av skaða í høvdið, verður upplýst av løgreglustøðini.