Tyrlan er lend á mars

Í morgun hendið eitt lítið undur á mars. Menniskjað hevur sett eina tyrlu á gongustjørnuna. Nú verður farið undir fyrireikingarnar til fyrstu royndarflúgvingina.

Enn hevur menniskjað ikki sjálvt sett fótin á mars, men har er nógv virksemi, skapt av menniskjum.

Tað eru bert nakrar vikur síðani, at akfarið Perseverance setti seg á mars. Í morgun hendi so annar táttur í hesi hugtakandi kanningarferð.

Inni í Perseverance var ein lítil 1,8 kilo tung tyrla, Ingenuity, sum í dag varð sett út á reyðu skorpuna á mars.

Eftir at hava ferðast 471 milliónir kilometrar inni í Perseverande, varð tyrlan í dag slept teir tíggju sentimetrarnar niður á marsskorpuna. Onnur avbjóðingin er at klára náttina, skrivaði Nasa á Twitter í dag.

Tað kann vera sera kalt á mars, niður í 150 minusstig, men vánirnar í løtuni siga, at kuldin verður 90 stig undir frostmarkið.

Nú er spenningur um hvussu elektronikkurin á tyrluni fer at klára kuldan. Í tyrluni er ein varmaskipan, ið skal halda hitanum uppi á sjey plussstigum.

Higartil hevur tyrlan fingið orku frá Perseverance. Nú skal hon klára seg sjálv.

Komandi dagarnar skal Nasa tryggja sær, at sólpanelini, battaríini, motorarnir og følararnir á Ingenuity virka sum tey skulu áðrenn roynt verður at senda hana upp at flúgva.

Nasa sigur, at tað gongur ein vika áðrenn Ingenuity kann fara undir hesa søguligu flúgvingina.