Alda Nielsdóttir
Tað er ikki rætt at hava val, meðan landið enn er í kríggi.
Tað var boðskapurin hjá ukrainska forsetanum, Volodymyr Zelenskyj, tá hann helt røðu í gjár.
Zelenskyj legði dent á, at tað hevur týdning av savna seg um at vinna kríggið og gera íløgur í herin, og at tað hevði verið óforsvarligt at hildið val, skrivar Reuters.
Valskeiðið hjá Zelenskyj, sum kom til valdið í 2019, eigur annars at enda í mars 2024, men í roynd og veru eru øll val avlýst orsakað av undantaksstøðuni í landinum. Eitt nú átti tjóðartingsval at verið í oktober, men tað varð av ongum.
Útsøgnin hjá Zelenskyj kemur fáar dagar eftir, at ukrainski uttanríkismálaráðharrin, Dmytro Kuleba segði, at Zelenskyj umhugsaði fyrimunir og vansar við at hava val sum ætlað í 2024, og tað hevur hann nú gjørt.
Kuleba vísti á, at tað kundi vera torført at hava val, nú nógvir ukrainar eru farnir av landinum og nógvir stríðast á vígvøllinum, umframt at Russland hevur hersett fleiri øki. Eisini varð stúrt fyri, at valstøð verða mál fyri russisk dronu- ella rakettálop.
Vinarliga broyt tínar kennifíla - og privatlívsstillingar fyri at síggja hetta innihald