Ukraina vil hava Russland fyri altjóða dómstól

Ukraina hevur kært Russland til altjóða dómstólin í Haag, sigur ukrainski forsetin, Volodimir Zelenskij.

– Russland skal ábyrgdast fyri at misnýta hugtakið fólkadráp til at rættvísgera ágang, sigur hann í dagføring á Twitter, sum Ritzau endurgevur.

Russland hevur sagt, at fólkadráp er framt móti prorussiskum loysingarfólkum í eystara parti av Ukraina, og at innrásin í Ukraina er ein roynd at avvápna landið.

Ein stórur partur av altjóða samfelagnum hevur tó fordømt russisku innrásina.

– Vit hava biðið um eina skjóta avgerð um, at Russland skal gevast við øllum hernaðarliga virkseminum nú, og vit vænta, at eitt rættarmál kann byrja í komandi viku, sigur ukrainsk forsetin.

Altjóða dómsstólurin í Haag varð settur á stovn av ST í 1945. Hann er eisini kendur sum ICJ, ið er ein stytting fyri "International Court of Justice".