Umhvørvisgóðkenningin hjá smoltstøðini á Fútakletti dagførd

Smoltstøðin er útbygd soleiðis, at hon kann framleiða munandi fleiri og størri smolt. Støðin hevur vatnreinsiskipan, har vatnið verður endurnýtt á sera høgum stigi.

Smoltstøðin leiðir spillivatnið frá rakstrinum umleið 600 m út í Vestmannasund, meira enn ein km norður frá aliøkinum hjá P/F Luna suðuri í Bug. Spillvatnið inniheldur skarn og fóðurleivdir frá framleiðsluni.

Dentur er lagdur á, at skarn og fóðurrestir ikki skulu elva til upphóping á botni ella til aðra sjónliga dálking á staðnum. Treytir eru m.a. settar um, at P/F Luna ger kanningar av botninum við munnan á spillvatnsútleiðingini. Um tað vísir seg, at útlátið frá smoltstøðini elvir til dálking, sum ikki er uttan týdning, kann Umhvørvisstovan krevja, at bøtandi atgerðir verða gjørdar.

Eisini eru treytir settar um, at virksemið á smoltstøðini ikki má hava við sær ampar av óljóði, lukti o.ø.

Umhvørvisgóðkenningin kann síggjast her.

Umhvørvisstovan