Umhvørvisvikan hjá Tórshavnar kommunu verður 3. - 10. mai

Í døgunum 3. til 10. mai verður umhvørvisvikan hjá Tórshavnar kommunu aftur á skránni, og evnið í ár er grønur lívsháttur.

– Við heitinum “Slóða fyri” granska vit, hvat vit hvør sær og saman kunnu gera fyri at verja umhvørvið – bæði í tí gerandisliga, men eisini yvirskipað við t.d. ikki at lata okkum lumpa av grønvasking, taka lut í orðaskiftinum um umhvørvispolitikkin hjá Tórshavnar kommunu og seta krøv til bæði vinnu og tað almenna.

– Høvuðsdenturin verður tó lagdur á, hvussu vit saman fáa betri umhvørvisligar og burðardyggar vanar, og hvussu Tórshavnar kommuna kann slóða fyri, so tað gerst lættari hjá okkum øllum at velja grønu leiðina, skrivar kommunan.

Á skránni, sum verður kunngjørd í næstum, verða fyrilestrar, kjak, verkstovur, filmssýning, familjudagur við spíriverkstovu, klædnaumbýtingartiltak og mangt annað. Ein serlig skrá er til skúlar, miðnámsskúlar og dagstovnar, og vælumtóktu afturvendandi tiltøkini sum ruddingardagarnir, gongutúrar í náttúruni og ’Plantið eitt træ’ eru eisini á skránni aftur í ár.

Sum vant verða bæði grøna virðislønin hjá Tórshavnar kommunu og umhvørvisstuðulin handað á umhvørvisvikuni.

Umhvørvisvikan tekur støði í heimsmálunum hjá ST fyri burðardygga menning, og í ár eru tað heimsmál 3: góð heilsa og vælferð, nr. 11: burðardyggir býir og bygdir og nr. 12: ábyrgdarfull nýtsla og framleiðsla, sum eru í miðdeplinum, skrivar kommunan.