Umleið 400 litrar av olju á sjógv í Mykinesi

Mikudagin verður tá menn vóru í holt við at pumpa gassolju av Grønanesi niðan í oljutangan hjá SEV í Mykinesi, glapp eitt skoyti á slanguni av, og nakað av olju lak á sjógv.

Í fyrstani varð mett, at talan var um so lítla nøgd - 47 litrar - at onki varð gjørt við málið.

Tað vísti seg tó at meira var farið á sjógv enn so, og tøl sum 4000 litrar komu upp at venda, skrivar Sørvágs kommuma á heimasíðuni.

Tískil fóru sløkkiliðsmenn hjá Sørvágs kommunu, saman við borgarstjóranum, út til Mykinesar at fáa greiði á málinum. Vegna brim var ikki leggjandi at í Mykinesi fyrrenn í dag, tá sløkkiliðsfólkini komu út við útgerðini at sperra av við.

- Tað vísti seg, at umleið 400 litrar vóru farnir á sjógv, men tíbetur hevði hetta ikki gjørt nakran skaða. Gassolja fordampar skjótt, og onki sást til oljuna í dag. Sostatt var ikki neyðugt at brúka útgerðina, sum tó verður liggjandi í Mykinesi, um brúk verður fyri henni seinni, sigur Sørvágs kommuna.

Sørvágs kommuna fer nú at eftirmeta støðuna, og saman við SEV gjøgnumganga mannagongdirnar, at finna eina tryggari loysn, tá olja verður pumpa í land í Mykinesi.