Umleið ein tími til Norðoyggjar hava streym aftur

Streymveitingin hjá SEV hevur verið svikalig seinnapartin og í kvøld, men nú er streymurin aftur í flestu støðum.

Fyri tíggju minuttum síðani boðaði SEV frá, at Vágar, Streymoy, Sandoy og størsti parturin av Eysturoy hava streymin aftur.

Norðoyggjar liggja enn í streymloysi, og tað gongur umleið ein tími til tey hava streym aftur, sigur SEV.

Tað var um trý tíðina, at streymurin fór í Norðoyggjum og parti av Eysturoynni. Hálvanannan tíma seinni misti alt meginøkið streymveitingina.