Unicef: 9,3 milliónir sýrisk børn hava tørv á hjálp

Í løtuni hava fleiri sýrisk børn tørv á hjálp enn nakrantíð áður, síðan borgarakríggið í landinum breyt út fyri meira enn tíggju árum síðani.

Barnahjálparfelagsskapurin hjá ST, Unicef metir, at 9,3 milliónir børn í Sýri og grannalondunum hava tørv á hjálp.

Men peningurin til endamálið minkar, sigur Julietta Touma, talsfólk hjá Unicef, sum leggur afturat, at børnini ikki eiga at líða longur.

Sambært Unicef eru fleiri enn 6,5 milliónir børn í Sýria, sum hava tørv á neyðhjálp, og tað er hægsta talið, síðan kreppan í landinum byrjaði.

Í grannalondunum, sum fleiri sýrar hava leitað sær til, eru eisini 2,8 milliónir børn bundin av hjálp frá øðrum.

Kríggið í Sýria verður mett at hava kravt nærum eina hálva millión mannalív, meðan fleiri milliónir hava msit hús og heim.

Leiðarin hjá Unicef í Miðeystri sigur, sambært Ritzau, at nógvar familjur stríðast við at fáa endarnar at røkka saman, og at prísirnir á vanligum vørum bara vaksa, partvíst orsakað av støðuni í Ukraina.