Nýggj fosturtøkulóg í amerikanskum stati – Ikki loyvt at hjálpa gentum at fáa fosturtøku

Hósdagin skrivaði guvernørurin í amerikanska statinum Idaho, Brad Little undir eina nýggja lóg, sum ger tað ólógligt at hjálpa ómyndigum at fáa fosturtøku uttan samtykki frá foreldrunum.

Síðan amerikanski hægstirætturin á sumri í 2022 ógildaði avgerðina Roe v. Wade frá 1973, sum gav kvinnum í øllum USA rætt til fosturtøku, hava fleiri statir hert sínar fosturtøkulógir. Nýggja lógin í Idaho, ið verður nevnd "abortion trafficking", er tann fyrsta av sínum slag í USA, skrivar AP.

Idaho hevur longu bannað nærum allari fosturtøku. Í august í fjør varð fosturtøka bannað í statinum uttan so at talan var um blóðskemd ella neyðtøku.

Sambært nýggju lógini, sum kemur í gildi um ein mánað, kunnu borgarar, sum hjálpa gentum undir 18 ár við at ferðast til annan stat at fáa fosturtøku, fáa millum tvey og fimm ára fongsulsrevsing. Eisini kunnu teir verða rættarsøktir av foreldrunum hjá gentuni.