Útvið 37.000 ferðafólk um flogvøllin í apríl mánaða

Ferðafólkatalið á flogvøllinum í Vágum byrjar at nærkast tí, sum tað var, áðrenn koronafarsóttin breyt út.

Hetta staðfesta nýggjastu tølini, ið Kringvarpið vísir til í dag.

Fyri apríl var ferðafólkatalið 36.853. Hetta eru beint yvir 1.110 færri fólk í mun til í apríl 2019, tá tað var 37.973.

Um hugt verður eftir árinum higartil, so er talið góð 83 prosent av tí, sum tað var fyri fyrstu fýra mánaðirnar í 2019, skrivar kvf.fo.

Harvið er flogferðslan í Vágum á veg til sama støði, sum hon var áðrenn mars 2020, tá tølini fóru ógvusliga langt niður, orsakað av korona.