Vaksandi fiskavirksemi í Knettahúsinum í Leirvík

PrimaFisk í Leirvík hevði 15 ár á baki í fjør.

Samstundis vóru 110 ár liðin, síðani Karl Hansens Eftf. sum elsta vinnuvirkið í Leirvík - og sum í hálva øld framleiddi fiskavørur til føroyska marknaðin - varð stovnað. Og 45 ár síðani, at Rasmus Hansen fór undir framleiðslu av eitt nú teimum tiltiknu Leirvíksknettunum.

- Í dag fevnir virksemi okkara eisini um hesar báðar fyritøkurnar, sum vit yvirtóku fyri nøkrum árum síðani, og samstundis er alt virksemið savnað undir somu lon í fyrrverandi Knettahúsinum á Toftanesi 33, greiðir Jan Erlingsson Petersen, stjóri, eldhugaður frá.

- Tíverri fingu vit ikki hátíðarhildið nakran av hesum trimum merkisdøgunum vegna Koronusmittuna, harmast hann um.

- Tá vit í síni tíð fóru undir framleiðsluna av fiskapylsum, búffum og suppu, avtalaðu eg og Rasmus á Knettavirkinum, at vit ikki skuldu framleiða vørur í kapping ímóti hvør øðrum, og hetta var galdandi so leingi sum vit vóru undir hvør sínari lon.

- í 2018 yvirtók eg fyrst raksturin av virkinum hjá honum, men keypti síðani virkið. Í 2019 varð framleiðslan hjá PrimaFiski flutt úr Tavuni í Knettahúsið, og síðani hevur øll framleiðslan verið á einum stað.

- Rávøran, ið verður nýtt í framleiðsluni, er toskur og hýsa, sum vit arbeiða á virkinum, umframt gulllaksafars frá Tavuni. Framleiðslan fevnir í dag um allar vanligar fiskavørur, so sum knettir, frikadellur, flak, fiskabúffar og fiskapylsur, greiðir vælnøgdi stjórin frá.

Les alla greinina ókeypis í Blaðnum Vikuskifti her