Ingi Samuelsen
Partarnir í krígnum í Gaza millum Ísrael og Hamas, er samdir um at leingja vápnahvíldina við tveimum samdøgrum.
Tað sigur talsmaðurin fyri uttanríkisráðið í Katar, Majed al-Ansari, á sosiala miðlinum X í dag.
Katar hevur virkað sum meklari í ósemjuni og var við til at fáa í lag vápnahvíldina, ið stóð til at renna út í dag.
Hamas-felagsskapurin hevur váttað, at vápnahvíldin er blivin longd, skrivar dr.dk.
- Vit eru vorðin samd við okkara brøður í Katar og Egyptalandi um at leingja humaniteru vápnahvíldina í tveir dagar afturat eftir somu treytum sum higartil, sigur Hamas í eini fráboðan, sum Sky News og Reuters endurgeva.
Enn hava myndugleikarnir í Ísrael ikki váttað, at vápnahvíldin er longd.
Diaa Rashwan, talsmaður fyri stjórnina í Egyptalandi, sum saman við Katar hevur virkað sum meklari, segði fyrr í dag, at Ísrael og Hamas vóru nær við at gera eina avtalu um at leingja vápnahvíldina í tveir dagar.
Við leingingini verða 20 ísraelskir gíslar afturat og 60 palestinar, ið eru fongslaðir í Ísrael, leyslatin.
Hetta er ikki váttað av pørtunum, skrivar dr.dk.
Vinarliga broyt tínar kennifíla - og privatlívsstillingar fyri at síggja hetta innihald